काठमाडौँ, २३ माघ । आवासीय चिकित्सकहरूले थालेको आन्दोलनमा मेडिकल क्षेत्रका विभिन्न संघसंस्थाहरूले ऐक्यबद्धता जनाएका छन् ।
सोसाईटी अफ एनेस्थेसियोलोजिस्ट नेपाल, सोसाईटी अफ ओटोल्र्याङगोलोजिष्ट अफ नेपाल, साईक्रेटिष्ट एसोसिएसन अफ नेपाल, नेपाली सोसाईटी अफ क्रिटिकल केयर मेडिसिन लगायतका संस्थाले विज्ञप्ति जारी गर्दै आवासीय चिकित्सकहरूले उठान गर्दै मागप्रति ऐक्यबद्धता जाहेर गरेका हुन् ।
उनीहरूले गर्दै आएको आन्दोलनप्रति आफूहरूको ध्यानाकर्षण भएको जनाउँदै ती संस्थाहरूले माग पुरा गराउन सम्बन्धित निकायलाई अनुरोध गरेका छन् ।
नेपालको संविधानको मौलिक हक मध्येको धारा ३४ को उपधारा २ अनुसार प्रत्येक श्रमिकलाई उचित पारिश्रमिक, सुविधा तथा योगदानमा आधारित सामाजिक सुरक्षाको हक हुने व्यवस्था रहेको तर, आवासीय चिकित्सकहरू त्यसबाट वञ्चित भइरहेको उनीहरूको भनाई छ ।
आवासीय चिकित्सकहरूको सुविधा कम्तीमा मेडिकल अधिकृत सरह हुनेगरी नियम कानुन निर्माण गरी सुनिश्चित गर्न समेत अनुरोध गरेका छन् ।
नेपालमा चिकित्सकलाई सुरक्षित रूपमा स्वास्थ्य सेवा प्रदान गर्ने वातावरण सुनिश्चित गर्न समेत सरोकारवालालाई अनुरोध गरेका छन् ।
