काठमाडौँ ,२१ चैत । काठमाडौं महानगरपालिकाका प्रमुख प्रशासकीय अधिकृत सरोज गुरागाईं महानगरपालिका कार्यालय पुग्नुभएकाे छ। उहाँलाई कर्मचारीहरूले नै पहरा दिएर कार्यकक्षसम्म पुर्याउनुभएकाे छ।
कर्मचारीहरूले उहाँको कार्यकक्षमा लगाइएको ताला फुटाउन प्रयास गरेका थिए । त्यसक्रममा सीसी फुटेको छ। गुरागाईंलाई महानगरपालिकामा रोक्न मेयर बालेन्द्र शाहले महानगर प्रहरी परिचालन गरी अवरोध गर्नुभएकाे थियाे।
उहाँले गुरागाईंको कार्यकक्षसमेत बन्द राख्न लगाउनुभएकाे थियाे। हाजिर हुन महानगरपालिका पुगेका गुरागाईंलाई नगर प्रहरीले गेटमै अवरोध गर्न खोजेका थिए। तर, कर्मचारीहरूले रोक्न नदिइ उहाँलाई कार्यालय प्रवेश गराएका हुन्। गत पुस ७ गतेदेखि गुरागाईंलाई बिदामा राखिएको थियो ।
प्रमुख प्रशासकीय अधिकृत नहुँदा महानगरपालिकाका कर्मचारीले तीन महिनादेखि तलबभत्ता लिन पाएका छैनन्। महानगरपालिकाको सेवा प्रभावित छ।
