गलकोट,१९ साउन । जिल्लामा साउनयता २६ जनामा डेंगु पुष्टि भएको छ । डेंगु पुष्टि भएकामध्ये गलकोट नगरपालिकामा मात्रै २४ जना छन् ।  बागलुङको मध्यभागमा रहेको गलकोट अहिले डेंगु  र स्क्रब टाइफसको उच्च जोखिममा रहेको स्वास्थ्य कार्यालयका जनस्वास्थ्य निरीक्षक देवप्रकाश घिमिरेले जानकारी दिए । साउनमा जिल्लाभर २६ जनामा डेंगु  पुष्टि भएकामध्ये गलकोटमा मात्रै २४ जना बिरामी छन् । दुई जनाको धौलागिरि अस्पतालमा सङ्क्रमण पुष्टि भएको थियो ।

“गलकोट डेंगु  मात्रै हैन स्क्रब टाइफसको समेत उच्च जोखिममा रहेको पाइएको छ”, जनस्वास्थ्य निरीक्षक घिमिरेले भने, “अहिले गलकोट नगर अस्पतालमा एक दर्जन डेंगु  र स्क्रब टाइफसका बिरामी उपचाररत छन् भने दैनिक चारदेखि पाँच जनामा डेंगु र स्क्रब टाइफस पुष्टि भइरहेको छ ।”