पूजा खड्का
पोखरा, २ फागुन । पोखरामा हुने भनिएको महायज्ञका संचालक कृष्ण मूर्तिले दिएको अभिव्यक्ति प्रति पोखरा महानगर पालिका वडा नम्बर २६ का वडा अध्यक्ष नरेन्द्र थापाले बिरोध जनाउनु भएको छ । “धर्मका लागि अधर्म गर्न तयार छु” भन्ने कृष्ण मूर्तिकाे अभिव्यक्ति प्रति सामाजिक संजाल मार्फत कडा प्रतिवाद गर्नुभएको हो ।
सामाजिक संजाल मार्फत पोखरा महानगरपालिका वडा नम्बर २६ का वडा अध्यक्ष थापाले धर्मका नाममा धम्की आफूहरुलाई सह्य नहुने बताउनुभएको छ। उहाँले पोखराको लेकसाईडमा मानव सेवा फाउन्डेसनको आयोजनामा महायज्ञ लगाउने चर्चा चलिरहदा निस्केको विवाद बाट धर्मका नाममा अधर्म गर्न तयार रहेको कृष्ण मूर्तिको भनाइलाई विरोध गर्दै महानगर र फाउन्डेसनको विवादको विषय लिएर वडा नम्बर २६ का वडा अध्यक्ष नरेन्द्र थापाले धर्मका नाम मा धम्की आफूहरुलाई मान्य नहुने भन्दै सामाजिक सञ्जालमा खुलासा गर्नुभएको छ ।
उहाँले हिन्दु धर्मशास्त्र र पूर्विय सभ्यतामा बर, पिपल र समीका बोटलाई त्रिदेव को रुपमा व्याख्या गरीएको उल्लेख गर्दै अक्सिजन दिने रुखहरूको छुट्टै महत्वपूर्ण भूमिका रहन्छ र पुराना रुखहरूको धार्मिक र वैज्ञानिक महत्व रहेको उल्लेख गर्दै यिनीहरूको संरक्षण स्थानियको जिम्मेवारी भएको उल्लेख गर्नुभएको छ।
धार्मिक र बैज्ञानिक हिसाबले महत्व बोकेका बोटहरु लाई पोखरामा महायज्ञ संचालन गर्ने नाममा ठुटो बनाईएकोमा हिन्दुधर्मका अनुयायीहरुको गंभिर ध्यानाकर्षण रहेको विषयलाई उल्लेख गर्दै उहाँले त्रिदेव लाई नै काटेर कस्तो धर्मको रक्षा गर्न खोजिएको हो भन्दै प्रश्न समेत उठाउनुभएको छ।
उहाँले सामाजिक संजालमा लेख्नुभएकाे छ
धर्मका नाउँमा धम्की सैहृय छैन ।
हिन्दु धर्मशास्त्र र पूर्विय सभ्यतामा बर, पिपल र समीका बोटलाई त्रिदेवको रुपमा व्याख्या गरीएको पाईन्छ । बरलाई शिव, पिपललाई विष्णु र समी लाई ब्रह्मा भनेर धर्मशास्त्रमा उल्लेख गरिएको छ । त्रिदेवको रुपमा रहेका चराचर जगतलाई अक्सिजन दिने रुख मध्ये बर, पिपल र समीको छुट्टै महत्वपूर्ण भूमिका हुन्छ । वैज्ञानिकहरूका अनुसार पिपल एकमात्र यस्तो वृक्ष हो, जसले २४ सै घन्टा अक्सिजन छोड्छ । त्यसैले पिपलको नजिक जाँदा रोग निको हुन्छ र शरीर स्वस्थ रहन्छ भनिन्छ । आयुर्वेद विज्ञानमा औषधीको रुपमा प्रयोग गर्ने यी रुखलाई विष्णु भगवानको अवतारको रुपमा पुजा पनि गरिन्छ ।
धार्मिक र बैज्ञानिक हिसाबले महत्व बोकेका बोटहरुलाई पोखरामा महायज्ञ संचालन गर्ने नाममा ठुटो बनाईएकोमा हामी हिन्दुधर्मका अनुयायीहरुको गंभिर ध्यानाकर्षणको बिषय हो । त्रिदेवलाई नै काटेर कस्तो धर्मको रक्षा गर्न खोजिएको हो ? धर्म प्राकृतिक सम्पदाको रक्षाका लागि हुनु पर्ने हो तर पछिल्लो समय व्यापार र असुलीको माध्यम बनाईएको छ । धर्म रक्षाका नाउँमा अधर्मि हुन तयार छु भन्ने कथित व्यक्तिबाट सिंगो महानगरलाई धम्की दिने कार्यलाई सैहृय मान्न सकिदैन । धर्मकै विनाश गरेर धर्मको रक्षा कसरी हुन्छ ? गेरु बस्त्र धारण गर्दैमा धार्मिक र सर्वज्ञान प्राप्त व्यक्ति भईदैन । सुन्दर नगरी पोखरामा धर्मको नाउँमा धार्मिक अराजकता मच्चाउने कुरा कदापी स्विकार्य पनि हुँदैन । महायज्ञ गर्न दिने नदिने भन्दा पनि यहाँको धार्मिक वातावरण खल्वल्याउने गरी कोही कसैलाई छुट छैन । कोटीहोमको मुल्य मान्यतालाई बिर्सिएर यसरी अराजकता प्रदर्शन गर्न धर्मका नाउँमा सुहाउने कुरा पनि हैन । यो स्थानीय सरकार हो । स्थानीय सरकारले धर्म, कलासंस्कृती, धार्मिक सम्पदा, मठ मन्दिर, चौतारा, ठाँटी पौवा, ताल, पोखरी कसरी संरक्षण गर्न पर्दछ भन्ने बिषय कसैले सिकाईरहनु पर्दैन । हामी एकसय बर्ष भन्दा पुराना र ऐतिहासिक रुखहरु संरक्षणका लागि बजेट विनियोजन गरेर काम गरिरहेका छौं । हामीले नै संरक्षण गरेका चौतारालाई ठुटो हुने गरी कटान गरिरहँदा र अझ धम्कीपूर्ण भाषा प्रयोग गर्ने धार्मिक व्यक्ति हुँ भन्नेलाई सुहाँउदैन । पुण्य प्राप्तिका लागि रोपिने बरपिपल र स्वामीका बोटको बध गरेर तिमीहरुले धर्ममाथि अपराध गरेका छौं । यो धर्मका हिसाबले पनि कही सैहृय छैन् । आउ धर्म रक्षाका लागि खुल्ला बहस गरौं हामी तयार छौं । तर स्थानीय सरकारलाई धम्की दिने कार्य रोक, तिम्रो धम्कीको राज अन्त चल्ला तर पोखरामा चल्दैन । यो कश्यप ऋषिको तपोभूमि हो, यहाँ ज्ञानका कुरा हुन्छ, धम्की र हिंसाका कुरा सैहृय छैन ।
नरेन्द्र थापा नरेन
वडा अध्यक्ष
पो.म.न.पा वडा नं २६
