पूजा खड्का
स्याङ्जा, १२ फागुन । अर्जुन चौपारी गाउँपालिका १ जल बराह धार्मिक वनमा धार्मिक महोत्सव स्वरुप सुरु भएको नवग्रह मन्दिरमा सोमबार एक करोड २५ लाख बत्ति बालिने भएको छ। ३:१५ को शुभसाइतमा बत्ति बालिने कार्यक्रम रहेकाे छ ।
१४४ वर्षमा आएको महाकुम्भको समय अत्यन्त पवित्र र फलदायी हुने हुँदा महाशिवरात्रीको अवसर पारेर नवग्रह मन्दिरको प्राण प्रतिष्ठा र धार्मिक अनुष्ठान स्वरुप महोत्सव गरिएको हो ।
धार्मिक अनुष्ठान सुरु भए संगै भक्तजनहरुको बाक्लो सहभागिता रहेको र शनिबार विशेष नवग्रहको दिन भएको हुँदा धार्मिक अनुष्ठानको लागि करिब २५ हजार भक्तजनहरु सहभागिता रहेको गाउँपालिका अध्यक्ष प्रकाश तिवारीले जानकारी दिनुभयो।
महाशिवरात्री सम्म चल्ने धार्मिक अनुष्ठान तथा महोत्सवमा विजया एकादशीको अवसर पारेर सोमबार १ करोड २५ लाख दीप प्रज्वलन गरिने भएको छ। यस महोत्सवमा चार वेदको पाठ परायण, गायत्री मन्त्रद्वारा हवन, धार्मिक अन्तरक्रिया, सन्ध्या कालिन आरती तथा भजन कृतन भइरहेको छ।
यस महोत्सवमा आचार्य श्री चैतन्य कृष्ण महाराज गुरु प्रमुख वाचक रहनु भएको उक्त कार्यक्रम मा शनिबार भने के एन स्वामीको धार्मिक प्रवचन रहेको थियो। नवग्रह मन्दिरमा धार्मिक अनुष्ठान को लागि सहभागी हरेक भक्तजनलाई रुद्राक्षको माला लगाउने व्यवस्था समेत गरिएको छ। नवग्रह शान्ति स्वरुप तुलसी को मठ, पिपलको बोट मुनि र तीर्थस्थल को एक छेउ मा बसेर गरिने नवग्रह को पूजा आजा अर्जुन चौपारीमा नवग्रह मन्दिर को निर्माण सँगै मन्दिर मा बसेर नवग्रह पूजा गर्न पाइने भएको छ।
आठ हेक्टर क्षेत्रफलमा फैलिएको यस धार्मिक वनमा नव भुज आकारको २७ फिट अग्लो नवग्रह मन्दिर बनाइएको छ । यस मन्दिरमा रहने पिल्लर को सबैभन्दा माथि आकाश तर्फ फर्काएर सौर्यमण्डलीय ब्रह्माण्डको प्रतीक राखिएको छ ।
पिल्लर को १४ फिटमा सूर्य, चन्द्र, मंगल, शुक्र, केतु, बुध, शनि, बृहस्पति र राहु का प्रतीक राखिएको छ भने पिल्लर को नौवटा भुजा मा ग्रह अनुसारका रंग लगाइएको छ । नवग्रह मन्दिर संगै षट्कोण शिवालय बनाइएको छ भने यसको बीचमा पशुपतिनाथको जस्तै पञ्चमुखी शिवलिङ्ग, गणेश, कुलदेवता,हनुमान, लक्ष्मी र काल भैरवको मूर्ति राखिएको छ । नौ चक्रमा रहेको मन्दिरको एक ठाउँबाट छिरेर परिक्रमा सहितको पूजा गरेपछि चक्रको पुछारमा रहेको सुरुङबाट बाहिर निस्कन मिल्नेछ। दुबो रोपेर स्थानिय ढुंगा विच्छाई हराभरा र सुन्दर बनाइएको मन्दिर निकै आकर्षक रहेको छ।
नवग्रह मन्दिर शनिबार मात्र खुला रहने र एक चक्रमा भने हरेक दिन पूजा गर्न सकिने र भक्तजनले अवलोकन गर्न सक्ने व्यवस्था मिलाइने अध्यक्ष तिवारी ले जानकारी दिनुभयो। । सौर्यमण्डलिय ब्रह्माण्डको मूर्ति भने हरेक वर्षको गणेश चतुर्थी मा मात्र हेर्न पाइने छ।
नवग्रह मन्दिर बनेको यस जल वराह धार्मिक वन भित्र ग्रह अनुसारका बिरुवा समेत रोपिएको छ । नवग्रह मन्दिर मा भिरकोट नगरपालिका को हेलू बजार बाट सात किलोमिटर को दूरी पार गरेपछि नवग्रह मन्दिर मा पुग्न सकिनेछ । १४४ वर्ष मा नै उत्तम मानिएको यो शुभ अवसर फलदायी रहने धार्मिक गुरुहरूको सल्लाह र सुझाब अनुसार नवग्रह मन्दिर मा सहभागी भई धार्मिक अनुष्ठान गर्न र पुण्य प्राप्ति गर्न अर्जुन चौपारी गाउँपालिका अध्यक्ष तिवारीले सबैलाई अनुरोध समेत गर्नुभएको छ।
