क्रान्ति अर्याल
स्याङ्जा, १२ फागुन । स्याङ्जाको गल्याङ नगरपालिका वडा नं. ५ र हात्तीस्थान फाउण्डेशनको संयुक्त आयोजनामा फागुन १३ गतेदेखि १७ गतेसम्म सञ्चालन हुन गइरहेको दोस्रो हात्तीस्थान तामेकोट समिट२०८१ उद्घाटन संचारमन्त्री पृथ्वी सुब्बा गुरुङले र समापन धनराज गुरुङले गर्नुहुनेभएकाे छ ।
समिटले कला, संस्कृति, इतिहास, वातावरण, कृषि, उद्योग, साहित्य, संगीत, अर्थतन्त्र, शिक्षा, विज्ञान तथा प्रविधि लगायतका विविध विषयमा संवाद तथा परिचर्चा गर्ने उद्देश्य राखेको छ ।
उद्घाटनको लागि नेपाल सरकारका मन्त्री बोलाएको भएपनी समापनको लागि यसै क्षेत्रका सांसद धनराज गुरुङलाई बोलाएको हात्तीस्थान फाउण्डेशनका अध्यक्ष डा. शिवशंकर बस्यालले एक पत्रकार सम्मेलनका बीच जानकारी दिनुभयो । यस क्षेत्रको विकासको चिन्ता यसै क्षेत्रबाट निर्वाचित जनप्रतिनिधिलाई हुने हुँदा समापनको लागि गुरुङलाई ल्याउन लगाइएको उहाँको तर्क थियो
उद्घाटन समारोह फागुन १३ गते दिउँसो ११ बजे हुनेछ । समिटमा देशभरका विशिष्ट व्यक्तित्वहरू तथा चर्चित कलाकारहरूको सहभागिता रहने आयोजक समितिले जानकारी दिएको छ । त्यस्तै, कार्यक्रमको संरक्षक गल्याङ नगरपालिका रहेको छ ।
समिटका विभिन्न दिनहरूमा क्षेत्रीय तथा राष्ट्रिय तहका विज्ञहरूको प्रवचन, कार्यपत्र प्रस्तुति र छलफलका कार्यक्रमहरू हुनेछन् । कला प्रदर्शनी, स्थानीय संस्कृति झल्काउने नृत्य तथा संगीत कार्यक्रम पनि समावेश गरिएको छ । विशेष आकर्षणको रूपमा स्थानीय उत्पादनहरूको प्रदर्शनी र व्यापार मेलाको समेत व्यवस्था गरिएको छ । समिटमा युवाहरूका लागि उद्यमशीलता र नवप्रवर्तन सम्बन्धी कार्यशाला सञ्चालन हुनेछ ।
समापन समारोह फागुन १७ गते हुनेछ ।
आयोजक समिति र स्थानीयवासीहरू समिटलाई सफल बनाउन सक्रिय रूपमा जुटिरहेका छन् ।
