क्रान्ति अर्याल
स्याङ्जा, १२ फागुन । स्याङ्जा व्यवसायिक तथा सीप विकास तालिम केन्द्र, पोखराको आयोजना र गल्याङ नगरपालिका स्याङ्जाको समन्वयमा सञ्चालन भएको तीन महिने आधारभूत कटाई सिलाई तालिम सोमबार सम्पन्न भएको छ ।
समापन समारोहलाई सम्बोधन गर्दै गल्याङ नगरपालिकाका उपप्रमुख हेमा न्यौपानेले आधारभूत कटाई सिलाई तालिमले विशेष गरी महिलाहरूलाई आत्मनिर्भर बनाउन महत्वपूर्ण योगदान पुर्याउने विश्वास व्यक्त गर्नुभयो । यस किसिमका व्यावसायिक सीप विकास तालिमहरू नियमित सञ्चालन हुन आवश्यक रहेको बताउदै उहाँले यस्ता तालिमले समुदायमा रोजगारीका अवसरहरू सिर्जना गर्ने बताउनुभयो । सहभागीहरूले प्राप्त सीपलाई व्यवहारिक जीवनमा प्रयोग गरेर आर्थिक रूपमा सबल बन्न प्रेरणा दिदै नगरपालिकाको तर्फबाट यस्ता उपयोगी तालिमहरूमा आवश्यक सहयोग र समन्वय गर्दै अगाडि बढ्ने प्रतिवद्धता व्यक्त गर्नुभयो । त्यसैगरी तालिम सफल बनाउन सहयोग गर्ने सम्पूर्ण पक्षलाई धन्यवाद व्यक्त गर्नुभयो ।
त्यसैगरी उक्त समापन समारोहमा तालिम केन्द्रका निमित्त प्रमुख डिल्लीराम सुवेदीले सहभागीहरूको उत्साहजनक सहभागिता र मेहनतको प्रशंसा गर्दै आगामी दिनमा आवश्यकताअनुसार थप तालिमहरू सञ्चालन गर्ने प्रतिबद्धता व्यक्त गर्नुभयो ।
त्यसैगरी प्रशिक्षकहरू सर्जु थापा र कृष्ण प्रसाद थापाले सहभागीहरूलाई तीन महिनासम्म आधारभूत कटाई सिलाई सम्बन्धी सीप प्रदान गर्नुभएको थियो ।
तालिममा २१ जना सहभागीहरूले सफलतापूर्वक प्रशिक्षण पूरा गरेका छन् । त्यस्तै उक्त कार्यक्रममा सहभागीहरूले प्राप्त सीपलाई व्यवसायिक रूपमा उपयोग गर्दै आत्मनिर्भर बन्ने प्रतिबद्धता समेत व्यक्त गरेका छन् ।
उक्त कार्यक्रमको अन्त्यमा सहभागीहरुलाई प्रमाणपत्र वितरण गरिएको थियो । उक्त कार्यक्रममा स्थानीय समुदायका प्रतिनिधिहरू तथा अन्य अतिथिहरूको उपस्थिति रहेको थियो । व्यवसायिक तथा सीप विकास तालिम केन्द्रका निमित्त प्रमुख डिल्लीराम सुवेदीको अध्यक्षतामा सम्पन्न कार्यक्रमको सञ्चालन साधना न्यौपानेले गर्नुभएको थियो ।
