क्रान्ति अर्याल
स्याङ्जा, १२ फागुन । सामाजिक विकास कार्यालय स्याङ्जाले चापाकोट नगरपालिका वडा नं. ६ मा रहेको राधा दामोदर आरोग्य आश्रमलाई रु ३ लाख अनुदान उपलब्ध गराएको छ । कार्यालय प्रमुख जीवन पौडेल र आश्रमका अध्यक्ष रामचन्द्र सिग्देलबीच उक्त अनुदान सम्बन्धी सम्झौता पत्रमा हस्ताक्षर भएको हो ।
उक्त कार्यक्रममा बोल्दै सामाजिक विकास कार्यालय स्याङ्जाका प्रमुख जीवन पौडेलले जेष्ठ नागरिकको सहज, मर्यादित तथा सम्मानजनक जीवनयापनमा सहयोग पुर्याउन अनुदान प्रदान गरिएको बताउनुभयो । त्यसैगरी उक्त रकम जेष्ठ नागरिकका लागि आवश्यक खाद्यान्न, औषधि उपचार, लत्ताकपडा तथा अन्य आवश्यक सामग्रीमा खर्च गरिने समेत बताउनुभयो ।
कार्यक्रममा चापाकोट नगरपालिका वडा नं। ६ का वडा अध्यक्ष तारा पोख्रेलले स्थानीय तह र माथिल्लो तहबीचको सहकार्यबाट यस्ता सामाजिक कार्य गर्न सकिने बताउनुभयो ।
स्याङ्जा सदरमुकामदेखि टाढा रहेको आश्रममै पुगेर सम्झौता गरिएको कार्य उदाहरणीय भएकोमा खुसी व्यक्त गर्नुभयो । सामाजिक विकास कार्यालयका लेखा अधिकृत मित्रबन्धु पौडेल र आश्रमका तर्फबाट अन्य वक्ताहरूले पनि जेष्ठ नागरिकहरू राष्ट्रका अमूल्य सम्पत्ति भएकाले उहाँहरूको सामाजिक सुरक्षा र संरक्षणमा सबैको भूमिका आवश्यक रहेको धारणा राख्नुभएको थियो । त्यसैगरी उहाँहरूको जीवन अनुभव, ज्ञान र सीपले समाजलाई मार्गदर्शन गर्न सक्ने भएकाले त्यसलाई सम्मानपूर्वक ग्रहण गर्नुपर्नेमा वक्ताहरूले जोड दिएका थिए । हाल राधा दामोदर आरोग्य आश्रममा २२ जना जेष्ठ नागरिक बसोबास गर्दै आएका छन् ।
