क्रान्ति अर्याल
स्याङजा, १३ फागुन। तपोभूमिको रुपमा रहेको नेपाललाई धार्मिक एवम् आध्यात्मिक भूमि निर्माणका लागि स्याङ्जाको अर्जुनचौपारी गाउँपालिकाले नेपालमै पहिलो नवग्रह मन्दिरको अनुष्ठान तथा गीताज्ञान एवम् धार्मिक महोत्सव सञ्चालन गरेको छ ।
छुट्टै पहिचान दिलाउने गाउँपालिकालाई धार्मिक पर्यटकीय क्षेत्रको हव बनाउने उद्देश्यले निर्माण गरीएको नवग्रह मन्दिरमा पछिल्लो समय भक्तजनहरुको निकै घुइँचो लागेको छ ।
नेपाल तथा भारतीय धार्मिक पर्यटक भित्राउने लक्ष्य सहित स्याङ्जाको अर्जुनचौपारी गाउँपालिकाले नेपालमै पहिलो नवग्रह मन्दिर निर्माण गरेको छ । धार्मिक शास्त्रका अनुसार नवग्रहको पुजाआजा गरे मानिसमा सुख, शान्ति र सबै ग्रहदशाहरु नास हुने जनविश्वास रहेको छ । हिन्दुहरुले आफ्नो घरमा कुनै न कुनै रुपमा नवग्रहको पूजा गर्ने गर्दछन् । यही आस्थालाई मध्यनजर गर्दै नवग्रहको मन्दिरको अनुष्ठान तथा गीताज्ञान एवम् धार्मिक महोत्सव सञ्चालन गरेको पालिकाले जनाएको छ । जसमा दर्शनका लागि टाढा टाढाबाट धार्मिक भक्तजनहरुको निकै घुइँचो लागेको छ भने स्थानीयहरु गाँउ ठाउँमै धार्मीक क्षेत्र बनेकोमा भक्तजनहरु समेत खुसी देखिन्छन ।
नवग्रह मन्दिर अनुष्ठान तथा गीताज्ञान एवम् धार्मिक महोत्सव नेपाल सरकारका संस्कृति, पर्यटन तथा नागरिक उड्डयन मन्त्री बद्रिप्रसाद पाण्डेले उद्घाटन गर्नुभएको हो ।
गाउँपालिका १ मा जलवराह धार्मिक वनमा स्थापना गरिएको मन्दिर परम्परा देखिनै चर्चित ठाउँ हो । वन परिसरमा ८ हेक्टर क्षेत्रफललाई समेटेर यो नवग्रह मन्दिर निर्माण गरिएको हो । भविष्यमा ध्यान केन्द्र र योगा गराउने स्थानका रुपमा विकसित गर्ने उद्देश्य पालिकाको रहेको छ । नवग्रह मन्दिरको मुख्य स्तभ नवभुज आकारको छ । जुन २ सय ७७ फिटमा बनेको छ । नवग्रह मन्दिरमा नौ ग्रहको मुर्ति राखिएको छ । छिमेकी पालिका र अर्जुनचौपारी गाउँपालिका भित्र रहेका धार्मिक पर्यटकीय क्षेत्रको रुपमा विकसित गर्ने र जलवायु परिवर्तन गर्नका लागि नवग्रह मन्दिरले टेवा पुग्ने नेपाल सरकारका संस्कृति, पर्यटन तथा नागरिक उड्डयनमन्त्री पाण्डेले बताउनुभयो ।
नेपालकै पहिलो नवग्रह मन्दिरको निर्माणले धार्मिक आस्थाको केन्द्र मात्र नभई आन्तरिक एवम् वाह्य पर्यटकहरुको केन्द्र बनाउन सकिने भएकोले यसको उचित प्रचारप्रसार गर्नु अनिवार्य रहेको छ । यस्ता धार्मिक पर्यटकीय स्थलहरुको सरकारी निकायबाटै संरक्षण एवम् सम्बर्द्धन गर्न सकेमा स्थानीयलाई समेत आर्थिक पक्षमा निकै टेवा पुग्ने विश्वास लिइएको छ ।
