काठमाडौं, २१ चैत । नेपालको सबैभन्दा पहिलो क्याम्पस त्रिचन्द्र क्याम्पसमा काँग्रेस सभापति शेरवहादुर देउवा र बरिष्ठ नेता शेखर कोईराला निकट वागी उम्मेदवारहरुलाई हराउदै महामन्त्री गगनकुमार थापा निकट उम्मेदवार विजयी भएका छन् । देउवा निकट श्रीधर श्रेष्ठ, कोइराला निकट सागर न्यौपाने र दिपक भट्टराई निकट विवेक न्यौपाने आधिकारीक उम्मेदवार गोविन्द कोईराला विरुद्ध बागी उम्मेदवार बनेका थिए । नेविसंघका आधिकारीक उम्मेदवार विरुद्ध देउवा र कोईराला निकट विद्यार्थी नेता वागी उठेपनि अधिकारीक उम्मेदवार कोईरालाले १२१५ मत प्राप्त गरी जित हासिल गरेका हुन् ।
नेविसंघकै बागी उम्मेदवार बनेका सागर न्यौपानेले ६८३ मत पाउँदा नेकपा एमाले निकट विद्यार्थी संंगठन अनेरास्ववियुबाट अध्यक्षका उम्मेदवार प्रमित विष्टले ४३१ मत पाएका थिए । स्ववियुको सचिव र कोषाध्यक्षमा पनि नेविसंघका आधिकारीक उम्मेदवार विजयी भएका छन् । सचिवमा आशिष गिरीले ८५६ मत र कोषाध्यक्षमा दुष्यन्त गौतमले ८८३ मत पाएर विजयी भएका हुन । त्रिचन्द्रमा नेविसंघ विरुद्ध अन्य पाँच विद्यार्थी संगठनले चुनावी गठबन्धन गरेपनि सवै पदमा नेविसंघका उम्मेदवार विजयी भएका छन् ।
अहिले स्ववियु निर्वाचन भएका अधिकांश ठाउँमा नेविसंघबाट उम्मेदवार भइ विजयी भएका मध्ये धेरैजसो महामन्त्री गगन कुमार थापा निकट विद्यार्थी नेताहरु रहेका छन् ।
