काठमाडौँ , १७ जेठ। प्रज्ञा स्मृति प्रथम महिला तथा पुरुष राष्ट्रिय खुला शारीरिक सुगठन प्रतियोगिता यहि जेठ २४ गते काठमाडौंमा आयोजना हुने भएको छ ।
स्वर्गीय प्रकाश दाहाल र स्वगीय ज्ञानु दाहालको स्मृतिमा स्थापना गरिएको प्रज्ञा स्मृति प्रतिष्ठानले शनिबार काठमाडौंमा पत्रकार सम्मेलन गर्दै जेठ २४ गते नेपाल पुलिस क्लव भृकुटिमण्डपमा प्रज्ञा स्मृति प्रथम महिला तथा पुरुष राष्ट्रिय खुला शारीरिक सुगठन प्रतियोगिता आयोजना गर्न लागेको जनाएको हो ।
प्रतियोगितामा पुरुषतर्फ ५ वटा वजन समूह अन्तर्गतका खेल हुनेछन्, जसअनुसार पुरुष तर्फ ६०, ६५, ७०, ७५ तथा ७५ केजी भन्दा माथिका समूह र महिलातर्फ खुला प्रतिष्पर्धा हुने प्रतिष्ठानकी निर्देशक गंगा दाहालले जानकारी दिनुभयो ।
पुरुषतर्फ वजन समूहतर्फ प्रथम, द्वितीय, तृतीय, चौथो र पाँचौ हुने खेलाडीहरुलाई क्रमश रु ५० हजार, ४० हजार, ३० हजार, २० हजार र १० हजार नगदसहित मेडल ट्रफि र प्रमाणपत्र दिइने उहाले बताउनुभयो । त्यस्तै महिलातर्फ प्रथम, द्वितीय, तृतीय, चौथो र पाँचौ हुने खेलाडीहरुलाई क्रमश रु १ लाख, ५० हजार, ३० हजार, २० हजार र १० हजार नगद सहित मेडल र प्रमाणपत्र प्रदान गरिने निर्देशक दाहालले जानकारी दिनुभयो ।
प्रतियोगीताको कूल खर्च रु ३५ लाख ३५ हजार अनुमान गरिएको आयोजकले जनाएको छ ।
