काठमाडौँ ,७ साउन । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीभित्रको भिन्न मतप्रति उदार हुने आफ्नो कमजोरी भएको बताउनुभएको छ ।
पुष्पलाल स्मृति दिवसका अवसरमा समाजवादी मोर्चाले बुधबार काठमाडौंको राष्ट्रियसभा गृहमा आयोजना गरेको कार्यक्रममा प्रचण्डले आफुले सधै फरक मत र बिचारलाई सम्मान गर्ने गरेको भन्दै भिन्न मतप्रति उदार हुने आफ्नो कमजोरी भएकाले पार्टीभित्र आफ्नो आलोचना हुने गरेको समेत बताउनुभयो ।
प्रचण्डले ३६ बर्ष कम्युनिष्ट आन्दोलन र माओवादीको नेतृत्व गर्दा आफुले किरण, बाबुराम, बादल लगाएत कुनै नेताहरुमाथि कारवाही नगरेको उल्लेख गर्नुभयो । अहिले पनि पार्टीका केहि नेताहरुले सिंगोरी खेल्न खोजेको भन्दै प्रयाप्त सिंगोरी खेल्ने मौका दिएको उहाले बताउनुभयो ।
प्रचण्डले सिंगोरी खेल्न खोज्ने नेताहरुलाई डेड महिना परामर्श भन्दै देशभर संगै लिएर हिडेको जिकिर गर्नुभयो । त्यस्तै उहाले दलाल पुँजीवादविरुद्ध क्रान्तिकारी शक्तिहरू एकजुट हुन आवश्यक रहेको उल्लेख गर्दै आफुले कम्युनिष्टहरूको एकताको झण्डा बोकेको तर्क गर्नुभयो ।
वर्तमान परिस्थितिमा केही भ्रम फैलाउने प्रवृत्ति देखिएकाले त्यसविरुद्ध जनता र क्रान्तिकारी शक्तिहरूलाई एकताबद्ध गराउनुपर्नेमा जोड दिनुभयो ।
अध्यक्ष प्रचण्डले कम्युनिष्ट आन्दोलनलाई संस्थागत गर्दै अगाडि बढ्नका लागि पुष्पलालको विचारलाई मूल मार्गदर्शक मान्नुपर्ने धारणा व्यक्त गर्नुभयो । त्यस्तै उहाले सबै कम्युनिष्ट शक्तिहरूलाई दलाल पुँजीवाद र आत्मसमर्पणवादी प्रवृत्तिविरुद्ध एकजुट भएर अघि बढ्न आह्वान समेत गर्नुभयो ।
