पाल्पा ८ जेठ । पाल्पाको रम्भा गाउँपालिकामा अहिलेसम्म नेकपा (एमाले)को अग्रता छ । एमालेबाट पालिका अध्यक्षका उम्मेदवार विष्णुप्रसाद भण्डारी चार हजार १८६ मतका साथ अगाडि हुनुहुन्छ । गठबन्धनबाट नेकपा (एकीकृत समाजवादी)का उम्मेदवार दुर्गाप्रसाद अधिकारी तीन हजार ३४८ मतका साथ पछाडी हुनुहुन्छ ।
उपाध्यक्षतर्फ एमालेबाट उम्मेदवार बन्नुभएकी राधादेवी श्रेष्ठ चार हजार ३४४ मतसहित अगाडि हुनुहुन्छ । यस्तै उहाँका प्रतिस्पर्धी गठबन्धनबाट नेपाली कांग्रेसका उम्मेदवार विष्णुकुमार थापाले तीन हजार ६१३ मत पाउनुभएको छ । पालिकाको पाँच वडामध्ये हालसम्म चार वडाको मात्रै मतपरिणाम सार्वजनिक भएको छ ।
वडा नं ३ को मतपरिणाम आउन बाँकी छ । चार वडामा सार्वजनिक भएको मतपरिणामध्ये अध्यक्ष पदमा ७०२ र उपाध्यक्षमा ४९९ मत बदर भएको पाइएको छ । वडा नं १ मा नेपाली कांग्रेसबाट अध्यक्षमा ईश्वर काफ्ले एक हजार ६४३ मतसहित विजयी हुनुभएको छ । उहाँका प्रतिस्पर्धी एमालेका मनबहादुर मश्राङ्गीले एक हजार ४४४ मत पाउनुभएको छ ।
यहाँ खुल्ला महिला सदस्य र दलित महिला सदस्य एमालेबाट र खुल्ला दुई सदस्य कांग्रेसका विजयी भएका छन् । वडा नं २ मा अध्यक्षमा एमालेका चेतबहादुर सुनारी ९३८ मतसहित निर्वाचित हुनुभएको छ भने प्रतिस्पर्धी कांग्रेसका रमेशप्रसाद प्रसाईंले ७३६ मत ल्याउनुभएको छ ।
वडा नं ४ मा एमालेकै अध्यक्ष कृष्णबहादुर रायमाझीको प्यानल नै विजयी भएको छ । निर्वाचित अध्यक्ष रायममाझीले ८३४ मत ल्याउनुभएको छ भने उहाँका प्रतिस्पर्धी कांग्रेसका चेतनारायण श्रेष्ठले ५७७ मत पाउनुभएको छ । वडा नं ५ मा एमालेकै प्यानल निर्वाचित भएको छ । यहाँ खुमकान्त बस्याल एक हजार १४० मतसहित विजयी हुनुभएको छ भने प्रतिस्पर्धी कांग्रेसका विष्णुबहादुर थापा कामुले ७२६ मत ल्याउनुभएको छ ।
यहाँ वैशाख ३० को निर्वाचनमा ११ हजार ४५७ मत खसेको थियो । बाँकी रहेको वडा नं ३ मा खसेको दुई हजार ९८४ मत गणना हुदैछ । रम्भामा गत वैशाख ३१ गते साँझ वडा नं ५ को मतगणना गर्ने क्रममा विवाद भएपछि एक हप्ता गणना स्थगित भएको थियो । विवाद समाधान पश्चात् यही जेठ ६ गते अपरान्हबाट मात्रै मतगणना कार्य थालिएको हो । पाल्पाका दश पालिकामध्ये अन्य नौ पालिकाको मत परिणाम सार्वजनिक भइसकेको छ ।
