काठमाडौँ, ४ बैशाख। नेपाली लेखक सङ्घको केन्द्रीय समितिको बैठकले अन्तर्राष्ट्रिय उपाध्यक्षमा कृसु क्षेत्रीलाई मनोनयन गरेको छ ।
सङ्घको शनिवार बसेको बैठकले कूटनैतिक जिम्मेवारी र साहित्यिक गतिविधिको सिलसिलामा करिब तीन दर्जन मुलुक भ्रमण गरेका क्षेत्रीलाई अन्तर्राष्ट्रिय उपाध्यक्षमा मनोनयन गरेको हो ।
विक्रम सम्मत २००७ सालमा बि पी कोइराला, रिद्दिबहादुर मल्ल, गोविन्दबहादुर मल्ल गोठाले आदिको सक्रियतामा स्थापित लोकतान्त्रिक साहित्यकारहरूको संस्था नेपाली लेखक सङ्घको सातौँ अधिवेशन गत चैत १८ र १९ मा श्रवण मुकारुङको अध्यक्षतामा पोखरामा सम्पन्न भएको थियो । सोही अधिवेशनले वरिष्ठ कवि तीर्थ श्रेष्ठको अध्यक्षतामा नवनिर्वाचित केन्द्रीय समिति चयन गरेको थियो ।
झापामा जन्मेका कवि क्षेत्री कविताका अतिरिक्त गीत गजल मुक्तक र सम्पादन गर्दछन् भने विलयन लेखनको प्रवर्तक पनि हुन् । कवि क्षेत्रीको चराको गीत अत्यन्त लोकप्रिय कविता सङ्ग्रह हो ।
क्षेत्रीको मनोनयनले नेपाली लेखक सङ्घलाई प्रवासमा विस्तार गर्ने अपेक्षा पूरा हुनेछ भन्ने सङ्घले विश्वास लिएको छ ।
