युएई ,३० कार्तिक । रोयल गोर्खा याक एण्ड यती एफसीले पाँचौं सहदेव स्मृति कप फुटबल प्रतियोगिताको उपाधि जितेको छ ।
युएई नेप्लिज फुटबल एसोसिएसन (युएनएफए) को आयोजनामा नेपाली समुदायबीच भएको प्रतियोगिताको फाइनलमा गोर्खा के नाइन एफसीलाई १–० ले हराउँदै रोयल गोर्खाले उपाधि जितेको हो ।
नविन विकेको निर्णायक गोलमा रोयल गोर्खा विजयी भएको थियो । अनिष श्रेष्ठ प्रतियोगिताको सर्वोत्कृष्ट खेलाडी, प्रज्वल राई उत्कृष्ट गोलकिपर, कुमार राई उत्कृष्ट प्रशिक्षक र विकास गुरुङ सर्वाधिक गोलकर्ता बनेका थिए ।
विजेता टोलीले ३ हजार ३ सय ३३ र दोस्रो टोलीले २ हजार २ सय २२ दिराम प्राप्त गरे । शनिबार र आइतबार भएको दुई दिने प्रतियोगितामा १४ टोलीको सहभागिता थियो ।
अनिल शेर्पाको अध्यक्षता रहेको युएनएफएले आयोजना गरेको प्रतियोगिताको समापनमा युएईस्थित नेपाली दुतावास, एनआरएनए, नेपाली समाज लगायतका प्रतिनिधिको सहभागिता रहेको आयोजक एसोसिएसनका प्रवक्ता तथा रोयल गुरखा एफसीका अध्यक्ष नवराज रानाभाट” तथा संरक्षक राजु तिमिल्सिनाले जानकारी दिनुभयाे ।
