क्रान्ति अर्याल
स्याङ्जा, २२ फागुन । वालिङमा आयोजित प्रथम पिंक सिटी वालिङ महोत्सव २०८१ को उद्घाटन समारोहमा नेकपा एमालेकी नेतृ तथा पूर्वमन्त्री पद्मा कुमारी अर्यालले देशको स्थायित्वका लागि नेपाली कांग्रेस र नेकपा एमाले सहकार्यमा आएको बताउनुभएको छ ।
कार्यक्रमलाई सम्बोधन गर्दै नेतृ अर्यालले राजनीतिक स्थायित्व बिना मुलुकको समृद्धि सम्भव नहुने भन्दै दुई ठूला दलहरूको सहकार्यले विकासलाई गति दिने विश्वास व्यक्त गर्नुभयो । देशलाई अधोगतिबाट जोगाउन कांग्रेस र एमाले मिलेर सरकार गठन गरेको बताउदै अबको सरकार स्थायित्व र विकासको स्पष्ट खाका बनाएर अगाडि बढ्नेछ समेत उहाँले बताअनुभयो ।
त्यसैगरी सरकार आर्थिक समृद्धि र लगानीमैत्री वातावरण निर्माण गर्न कटिबद्ध रहेको र निजी क्षेत्रलाई विकासको महत्वपूर्ण साझेदार मान्दै सरकारले सहकार्यलाई अझ मजबुत बनाउने प्रतिवद्धता समेत व्यक्त गर्नुभयो ।
कार्यक्रममा गण्डकी प्रदेशकी पूर्वमन्त्री एवं प्रदेशसभा सदस्य सरस्वती अर्यालले विकासका लागि सबै तहको सरकार र राजनीतिक दलहरू एकजुट हुनुपर्ने धारणा राख्नुभएको थियो । त्यस्तै स्थानीय बजेटको प्रभावकारी उपयोग गरी स्याङ्जा जिल्लालाई आर्थिक समृद्धिको मोडेल बनाउनुपर्नेमा उहाँले जोड दिनुभयो ।
त्यसैगरी नेकपा एमाले स्याङ्जाका अध्यक्ष सूर्यप्रसाद गैह्रे (पारस), नेपाली कांग्रेसका कार्यवाहक सभापति केदार काफ्ले, माओवादी केन्द्रका जिल्ला इन्चार्ज शैलेन्द्र घिमीरे लगायतले पनि महोत्सवमा आ–आफ्ना धारणा राखेका थिए । उद्घाटन अघि विभिन्न झाँकी प्रदर्शनसहित वालिङ बजार परिक्रमा गरिएको थियो । उक्त महोत्सव चैत ३ गतेसम्म सञ्चालन हुने आयोजकले जानकारी दिएको छ ।
