पूजा खड्का
स्याङ्जा,२३ चैत । अपांगता भएका व्यक्तिहरुलाई आय आर्जनमा जोड्ने उद्धेश्य सहित अपाङ्ग हरुको सकृयतामा स्थापना भई कृयाशिल अपांगता सशक्तीकरण तथा सामुदायिक विकास केन्द्र नेपाल स्याङ्जाले अपाङ्ग को घर परिवारलाई उन्नत जातको एक एक पाठी वितरण गरेको छ। पुतलीबजार नगरपालिकाको सहकार्यमा १० जना अपांगता भएका व्यक्ति तथा अपाङ्ग व्यक्तिको अभिभावक हरुका लागि बाख्रा पालन सम्वन्धि १ दिने तालिम सहित उन्नत जातका १/१ पाठी वितरण गरेको हो।
कार्यक्रममा पुतलीबजार नगरपालिकाका नगर प्रमुख तुलसीराम रेग्मीले नगरपालिका संगको सहकार्यमा यस संस्थाले आयोजना गरेका सवै कार्यक्रम प्रभावकारी देखिएको वताउदै समावेशी विकासमा अपांगता सवाल हरुका सन्दर्भमा संस्थाको तर्फबाट पालिका लाई पनि प्राविधिक सहजीकरण भईरहेकोले सहकार्य निरन्तर रहने प्रतिबद्धता व्यक्त गर्नुभयो ।
त्यसै गरी कार्यक्रममा नगर उपप्रमुख देवि अर्यालले तालिमवाट सिकेका ज्ञान र प्राप्त गरेको पाठीको उचित पालन गरि आयआर्जनमा जोडिन आग्रह गर्नुभयो । त्यसै गरी सामाजिक विकास समितिका संयोजक इम वहादुर सेन, पत्रकार एव संस्थाका सल्लाहकार भवानी अधिकारी, स्याङ्जा अपाङ्ग समाजका अध्यक्ष राम शर्मा पोखरेल लगायतले अपांगता भएका व्यक्तिहरुलाई आयआर्जनका माध्यमबाट जीवन यापनमा सहजीकरण र सम्मान पुग्ने वताउनुभयो।
वितरण कार्यक्रम अगाडि पशु चिकित्सक डा.अनिल गौतमले बाख्रा पालनका विविध विषयमा सहजीकरण गर्नुभएको थियोे भने संस्थाका अध्यक्ष युवराज पराजुलीले बाख्रा पालन गर्ने अपांगता भएका व्यक्ति तथा परिवारले पालना गर्नुपर्ने नियमहरुका वारेमा सहजीकरण गर्नु भएको थियोे ।
पालना गर्नुपर्नेमा मुख्य मुख्य नियममा यो घुम्ती कार्यक्रम भएकोले पहिलो पाठी संस्था ,टोल विकास संस्था , वडा कार्यालय को सिफारिसमा अर्को साथीलाई दिनुपर्ने ,केही समस्या आएमा संस्था ,सम्वन्धित टोल विकास संस्था र वडा कार्यालयमा तत्काल खवर गर्नुपर्ने, काटेर खान र बेचबिखन गर्न नपाईने र पशु विमा संस्थाको तर्फबाट नै गरिने लगायतका आबस्यक विषयका बारेमा जानकारी गराइएको थियो।
सोही कार्यक्रममा पुतलीबजार १ स्याङ्जा निवासी क्या.चित्र वहादुर मल्लले आफ्नो धर्मपत्नी हुम कुमारी मल्लको ४५ दिनको पुण्य तिथिमा संस्थालाई प्रदान गर्नुभएको ह्वील चियर पुतलीबजार ९ कोल्मा स्याङ्जा निवासी शारीरिक अपाङ्गता भएका कुल वहादुर गुरुङलाई हस्तान्तरण गरिएको थियोे ।
विद्यालय रक्याम्पसमा अपांगता सचेतना अभियान, स्वयंसेवक छनौट तथा परिचालन , पैरवी ,नीतिगत विषयमा प्राविधिक सहजीकरण ,क्षमता अभिवृद्धि तालिम ,सहायक सामाग्री वितरण ,जेष्ठ नागरिक दिवा सेवा केन्द्र संचालन लगायतका महत्त्वपूर्ण कार्यक्रम संचालन गरिरहेको यस संस्थाले आगामी २०८१ चैत्र ३० गते आफ्नो स्थापनाको वार्षिकोत्सब मनाउने जनाएको छ।
अपांगता सशक्तीकरण तथा सामुदायिक विकास केन्द्र नेपाल पुतलीबजार १ स्याङ्जाका अध्यक्ष युवराज पराजुली को अध्यक्षतामा सम्पन्न उक्त कार्यक्रमको संचालन सचिव नारायण रेग्मीले गर्नुभएको थियोे ।
