सुबास रेग्मी
स्याङ्जा,२३ चैत । २०६२/६३ मा आफैले मारेर फालेर घोडालाई काबुक हानेर समृद्ध नेपाल यात्राको गन्तव्यमा पुग्न नसकिने नेपाली काङ्ग्रेसका उपसभापति धनराज गुरुङले बताउनु भएको छ ।
वालिङ नगरपालिका १३ मा रहेको सरस्वती माबीको स्वर्ण महोत्सवको शनिवार समापन गर्दै पुर्व मन्त्री गुरुङले आफैले मारेर फालेको घोडा उठेर हिड्न थाल्यो भन्ने भ्रममा काङ्ग्रेस,एमाले,माओवादी लगायतका दल अलमलिन नहुने धारणा राख्नुभयो । उहाँले भन्नुभयो, ”मरिसकेको घोडालाई काबुक हानेर समृद्ध नेपालको गन्तव्यमा पुग्न सकिदैन ।”
नेताहरु जिम्मेवार नहुदा प्रतिगामी शक्ति सलबलाउन थालेको प्रसङ्ग जोड्दै उहाँले राजनैतिक दलका नेताले एकले अर्कालाई शत्रुताको व्यवहार गर्दा प्रतिगामी शक्ति सलबलाएको बताउनुभयो । उहाँले भन्नुभयो, “राम्रो गरेको जति मैले र गलत गरेको जति अरुले भन्ने प्रवृत्तिका कारण देशमा प्रतिगामी शक्तिहरु सलबलाए ।”
फरक झण्डा बोक्दैमा,फरक पार्टीमा लाग्दैमा सत्रुतापूर्ण व्यवहार गर्न नहुने भन्दै पछिल्लो समय एक पार्टीका नेताले अर्को पार्टीका नेतालाई गाली गर्ने गलत सस्कार बसेको धारणा राख्नुभयो । नेताहरु व्यक्ति केन्द्रित हुने गलत प्रवृत्ति बसेको भन्दै नेताहरुले म भन्दा पनि हामी भन्नुपर्ने बानिको विकास गर्नुपर्नेमा जोड दिनुभयो ।
सरस्वती माबी ५० औं बर्ष पुगेको अवसरमा चैत २१ गतेदेखि संचालन भएको स्वर्ण महोत्सव तीन दिन सम्म चलेको थियो । महोत्सव समापन गर्न गुरुङ शनिवार स्याङ्जा पुग्नु भएको थियो ।
