काठमाडौं, २५ वैशाख । भारतले पाकिस्तानमाथि गरेको अपरेसन सिन्दूरपछि भारत–पाकिस्तान अन्तर्राष्ट्रिय सीमामा तनाव छ । पन्जाबमा पनि सीमावर्ती क्षेत्रका मानिसहरू चिन्तित छन् । बुधबार राति करिब १ः४५ बजे अमृतसरका तीन ठाउँमा विस्फोटको आवाज सुनिएको थियो । यसपछि, जिल्ला प्रशासन र प्रहरी प्रशासनले तुरुन्तै कारबाही गर्यो र सम्पूर्ण जिल्लामा ब्ल्याक आउट लगायो ।
अधिकारीहरूले सर्वसाधारणलाई निरन्तर नआत्तिन अपिल गरेका थिए । श्री गुरु रामदास अन्तर्राष्ट्रिय विमानस्थल टर्मिनल पूर्ण रूपमा खाली गरिएको थियो र त्यहाँ पनि ब्ल्याक आउट गरिएको थियो । आवाज सुनिएको तर अहिलेसम्म कुनै अप्रिय घटनाबारे जानकारी नआएको प्रहरी आयुक्त गुरप्रित सिंहले बताए । वायुसेनाका विमानहरू निरन्तर आफ्नो कार्यमा संलग्न थिए । सीमावर्ती जिल्लाहरूमा बिहीबार पनि विद्यालयहरू बन्द रहनेछन् ।
सीमामा बढ्दो आवागमन देखेर, धेरै गाउँका मानिसहरू सावधानीका रूपमा आफ्नो घर छोडेर सुरक्षित स्थानतिर सर्न थालेका छन् । फाजिल्काको सीमावर्ती गाउँ मुहरजमशेर र मानसाका बासिन्दाहरूले आफ्ना बहुमूल्य सामानहरू र घरायसी सामानहरू ट्र्याक्टर–ट्रलीमा लोड गरेर गाउँबाट बाहिर सारिरहेका छन् । मानिसहरूले आफ्ना गाईवस्तु र आवश्यक सामानहरू आफूसँगै लिएर गएका छन् । जिल्ला प्रशासनले गाउँ खाली गर्न अहिलेसम्म कुनै आधिकारिक आदेश जारी गरेको छैन ।
तर मानिसहरूले आफैंले सावधानीका रूपमा यो कदम चाल्न थालेका छन् । सीमा पारबाट निरन्तर गतिविधि बढ्दै गएको र त्यसका कारण डरको वातावरण सिर्जना भएको स्थानीयवासी बताउँछन् ।
