काठमाडौं ,४ असार । संघीय संसद अन्तर्गतको पूर्वाधार विकास समितिले ललितपुरको ग्वार्को स्थित फ्लाइ ओभर निर्माणका सन्दर्भमा सरोकारवालासंग छलफल गर्ने भएको छ ।
बुधबार समितिले फ्लाइ ओभरको स्थलगत अनुगमन गर्दै सरोकारवालासंग छलफल गर्ने निर्णय गरेको हो । यहि शुक्रबार उद्घाटन गर्ने तयारी गरिएको ग्वार्को स्थित फ्लाइ ओभरको निर्माण कार्य ९९ प्रतिशत सम्पन्न भएको छ । अहिले फ्लाइ ओभरमा रंगरोगन गर्ने र डिभाइडर राख्ने काम भइरहेको छ । फ्लाइ ओभर निर्माणका क्रममा सडक बत्ति, नागरिकको सुुरक्षा, सिसिक्यामरा लगाएतलाई ध्यान दिएको नपाइएको समिति सदस्यहरुले जनाएका छन् ।
समिति सभापति दिपक बहादुर सिंहले ग्वार्को स्थित फ्लाइ ओभर निर्माणका क्रममा भएका कमी कमजोरी सुधार गर्दै काठमाडौंका अन्य स्थानमा पनि फ्लाइ ओभर बनाउन सरकारलाई निर्देशन दिने बताउनुभयो । करिव डेड बर्ष ढिलाई भएपनि फ्लाइ ओभर राम्रो बनेको पाइएको उहाले बताउनुभयो ।
सो क्रममा माओवादी सांसद माधव सापकोटाले निर्माणको सुरुमा केहि जटिलता देखिएपनि अहिले समग्रमा ग्वार्को स्थित फ्लाइ ओभर सम्पन्न भएको पाइएको उल्लेख गर्नुभयो । फ्लाइ ओभर निर्माणका क्रममा देखिएको कमिकमजोरीलाई सुधार गर्न सरोकारवालासंग छलफल गर्दै आवश्यक निर्देशन दिने उहाको भनाइ छ ।
सडक विभागले इपिसी मोडलमा फ्लाइओभर निर्माण गर्ने गरी २०७८ माघमा आरसी, समानान्तर र रेलिग्रे जेभीसँग ठेक्का सम्झौता गरेको थियो । समयमा नै निर्माण सम्पन्न नभएपछि पटक–पटक थप गरेर दिएको अन्तिम म्याद गत पुष ८ गते नै सकिसकेको थियो । म्याद सकिएपछि निर्माण कम्पनीले निरन्तर काम गर्दे फ्लाइ ओभरलाई अन्तिम चरणमा पुराएको हो ।
