पूजा खड्का
स्याङ्जा, १५ असार । स्याङ्जाको फेदीखोला गाउँपालिकामा पहिरोले एकै परिवारका आमा छोरीको मृत्यु भएको छ ।
मृत्यु हुनेमा फेदीखोला गाउँपालिका ५ बाँगे बस्ने ३१ वर्षीय दुर्गा जिटी र निजको छोरी ३ वर्षीय निसिका जिटी रहेको जिल्ला प्रहरी कार्यालय स्याङ्जाका सूचना अधिकारी इन्द्र बहादुर रानाले जानकारी दिनुभयो।
ढुङगा माटो र टिनले छाएको १ तले घरमा सुतिरहेको जिटी परिवारको घटनास्थलमा नै मृत्यु भएको रानाले बताउनुभयाे ।
शुक्रबार राति परेको अविरल वर्षाको कारण घरभन्दा २५ मिटर माथिबाट आएको पहिरोले घरगोठ पूर्ण रुपले पुरिएको छ ।
जिटीको गोठमा क्षति हुँदा एक भैंसीको समेत मृत्यु भएको प्रहरीले जनाएको छ ।
