क्रान्ति अर्याल
स्याङ्जा , १५ मंसिर । स्याङ्जाको कालीगण्डकी गाउँपालिकाको आयोजनामा “छैटौं अध्यक्ष कप तथा खेलकुद महोत्सव २०८१ ” सुरु भएको छ । नेपाल सरकारका सूचना तथा सञ्चारमन्त्री पृथ्वी सुब्बा गुरुङले खेलकुद महोत्सवको शुक्रबार उद्घाटन गर्नुभएको थियो ।
उद्घाटन समारोहलाई सम्बोधन गर्दै उहाँले आगामी निर्वाचनसम्म यहि गठबन्धन रहने र कसैले चाहेमा पनि सरकार नढल्ने बताउनुभयो । देशको समृद्धिका लागि दुई ठुला दल मिल्नुपर्ने बाध्यता आएको र प्रमुख दुई दलबीच असमझदारी रहे पनि देश बनाउन दुई दल एक ठाउँमा आएको उहाँले बताउनुभयो ।
त्यसैगरी खेलकुदको माध्यमबाट युवाहरूको सशक्तिकरण र नेतृत्व विकासमा टेवा पुर्याउनुपर्नेमा जोड दिनुभएको थियो । खेलकुदले समाजमा एकता, अनुशासन र स्वास्थ्यको महत्त्वलाई प्रवर्द्धन गर्ने कुरा बताउनुभयो ।
त्यसैगरी, स्थानीय स्तरमा यस्ता गतिविधिहरूले ग्रामीण क्षेत्रका खेलाडीहरूलाई अवसर प्रदान गर्ने,राष्ट्रिय तथा अन्तर्राष्ट्रिय स्तरमा खेलाडी उत्पादन गर्न मद्दत पुग्ने बताउनुभयो । कार्यक्रममा बोल्दै उहाँले सरकारको तर्फबाट खेलकुदको विकास र युवाका लागि नयाँ अवसरहरू सिर्जना गर्न अबको बजेटमा ५० अर्ब छुट्याउनपर्ने बताउनुभयो ।
त्यसैगरी उक्त कार्यक्रममा गण्डकी प्रदेश सदस्य कल्पना तिवारी, भिरकोट नगरपालिका प्रमुख गोविन्द कर्माचार्य, प्रमुख जिल्ला अधिकारी सुनीता नेपाल, नेकपा (एमाले) का अध्यक्ष सूर्यप्रसाद गैरे, नेपाली कांग्रेस जिल्ला उपसभापति शेरबहादुर थापा, माओवादी केन्द्रका ज्ञानप्रसाद भण्डारी, राष्ट्रिय जनमुक्ति पार्टीका बमबहादुर लामिछाने, पालिका अध्यक्ष खिमबहादुर थापा, उपाध्यक्ष सावित्रा कोइराला, पालिका प्रमुख प्रशासकीय अधिकृत परशुराम पोखरेल लगायतले आफ्नो धारणा राख्नुभएको थियो ।
मिर्मी खेलमैदानमा मंसिर १४ गते देखि सुरु भएको छैठौं अध्यक्ष कप तथा खेलकुद महोत्सव मंसिर १६ गतेसम्म संचालन हुनेछ । पुरूष महिला फुटबल, भलिबल, महिला क्रिकेट, दौड टेवल टेनिस, बुद्धिचालसहितका सात खेलका २२ विधामा सात सयभन्दा बढी खेलाडी सहभागी हुने गाउँपालिका अध्यक्ष खिम बहादुर थापाले बताउनुभयो ।
खेलकुद महोत्सवको उद्घाटन गर्नु अघि मन्त्री पृथ्वी सुब्बा गुरुङले कालीगण्डकी अस्पतालको आधारभूत आँखा उपचार केन्द्रको उद्घाटन गर्नुभएको थियो । हिमालय आँखा अस्पतालको प्राविधिक सहयोगमा सुरु भएको उपचार केन्द्र सञ्चालनका लागि पालिका अध्यक्ष खिम बहादुर थापा र हिमालय आँखा अस्पतालका अध्यक्ष सुरेन्द्र थापा मगरबीच समझदारी पत्र हस्ताक्षर गरी एक अर्कामा आदानप्रदान भएको थियो ।
