काठमाडौँ, १२ पुस । पोखराको सूर्यदर्शन सहकारीको बचत रकम अपचलन मुद्दाका आरोपी राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछानेको जिल्ला अदालत कास्कीमा बयान सकिएको छ । जिल्ला अदालत कास्कीका न्यायाधीश नीतिज राईको इजलासमा लामिछानेको दुई दिन बयान भएको हो ।
उहाँलाई २ दिनमा २६ भन्दा बढी प्रश्न गरिएको थियो भने आरोपमा इन्कारी बयान दिनुभएकाे छ । उहाँसँग पहिलो दिन बिहीबार ३ घण्टा र दोस्रो दिन शुक्रबार दिनैभरि बयान लिइएको हो । बयानका क्रममा उहाँले गोर्खा मिडियाको सबै जिम्मेवार जीबी राई रहेको बताउनुभएकाे छ ।
बयानका क्रममा लामिछानेले न्यायाधीशले सोधेका सजिला प्रश्नको जवाफ दिनुभयाे भने अप्ठ्यारा प्रश्नमा जीबी राईलाई जिम्मेवार बताउनुभएकाे थियाे । सहकारीको खाताबाट कुनै रकम नआएको र रकम नमासेको उहाँको दाबी छ ।
