जनकपुर, १२ माघ । मधेस प्रदेशको राष्ट्रियसभा निर्वाचनमा सत्ता गठबन्धका उम्मेदवार विजयी भएका छन् । महिलातर्फ उर्मिला अर्याल र अन्यतर्फ मोहम्मद खालिद सिद्धिकी विजयी हुनुभएको हो । अर्याल नेकपा (माओवादी केन्द्र) का र सिद्धिकी जसपाका उम्मेदवार हुनुहुन्छ । सिद्धिकी छ हजार ६७८ मतभारसहित विजयी भएको छ भने अर्यालले छ हजार १५६ मतभार ल्याएर विजयी हुनुभएको सहायक निर्वाचन अधिकृत विकास बस्नेतले जानकारी दिनुभयो ।
अर्यालका निकटतम प्रतिद्वन्द्वी लोसपाकी उम्मेदवार रुपाकुमारी यादवले तीन हजार २२८ मतभार ल्याउनुभयो भने सिद्धिकीका निकटतम प्रतिद्वन्द्वी नेकपा (एमाले) का उसमान अन्सारीले दुई हजार ७६६ मतभार प्राप्त गर्नुभयो । मधेस प्रदेशमा स्थानीय तहको प्रमुख र उपप्रमुखको मतभार १८ र प्रदेशसभा सदस्यको मतभार ४८ रहेको छ । जसअनुसार स्थानीय तहका चार हजार ८२४ र प्रदेशसभाका चार हजार ९९२ गरी कूल नौ हजार ८१६ मतभार रहेको छ । मधेस प्रदेशमा ३७२ मतदाता रहेकामा ३६६ मत खसेको थियो ।
