धादिङ,१९ भदौ । गोरखाका एक शिक्षकको मृत्यु हुँदा पालिकाभरिका ३९ वटै विद्यालय बन्द गरिएको छ । बारपाक सुलीकोट गाउँपालिका ४ को सौरपानी सामुदायिक स्मृति विद्यालयका शिक्षक रामकुमार श्रेष्ठको निधन हुँदा सबै विद्यालयमा सार्वजनिक विदा गरिएको हो ।
गाउँपालिकाका प्रमुख प्रशासकीय अधिकृत तुलसीराम आचार्यले सार्वजनिक सूचना जारी गरी सोमबार पालिकाभरिका सबै विद्यालय बन्द गरिएको हो ।
पालिकाको सूचनापछि सो पालिकाभरिका ३७ वटा सामुदायिक र दुईवटा निजी विद्यालय सोमबार बन्द भएका छन् । ‘पालिकाका अध्यक्षज्यूले बन्द गर्न भन्नु भएको थियो, त्यसैले मैले सूचना जारी गरेको हुँ’, प्रमुख प्रशासकीय अधिकृत आचार्यले भन्नुुभयो । तर पालिकाका प्रमुख विष्णु भट्टले भन्नुुभयो आफू पालिका बाहिर रहेकाले आपसी सल्लाह गरेर बन्द गरेको बताउनुुभएको छ । ‘भावनात्मक विषय भएकाले आपसमा सल्लाह गरेर बन्द भएको हुनसक्छ’, उहाँले भन्नुुभयो ।
एकजना शिक्षकको मृत्यू हुँदा पालिकाका सबै विद्यालय बन्द भएको सो पालिकामा यो पहिलो पटक हो ।
यसले आगामि दिनका लागि नजिर पनि हुनसक्ने शिक्षा शाखाका कर्मचारी भीमकुमार श्रेष्ठले बताउनुभयो। बिगत दुईबर्षदेखि पेटको समस्याले ग्रस्त शिक्षक श्रेष्ठको सोमबार बिहान पाटन अस्पतालमा निधन भएको थियो ।
