काठमाडौँ , १६ भाद्र।`पुस्तौं पुस्ताका लागि पुस्तकालय´ भन्ने आदर्श वाक्यका साथ सोह्रौँ राष्ट्रिय पुस्तकालय दिवस भव्य रुपमा मनाइएको छ ।
कमलपोखरी स्थित रसियन भवनमा शिक्षा विज्ञान तथा प्रविधि मन्त्रालयद्वारा आयोजित मूल समारोहलाई सम्बोधन गर्दै मन्त्री अशोककुमार राईले, `छिट्टै नेपाल राष्ट्रिय पुस्तकालयको सुविधासम्पन्न भवन काठमाडौंको जमलमा बन्ने बताउनुभयो ।´ मन्त्री राईले पछिल्लो समय ज्ञान आर्जन गर्नेभन्दा पनि सुचना मात्रै लिने प्रवृत्ति मौलाएको भन्दै पठन संस्कृतिको विकासका लागि पनि पुस्तकालयको आवश्यकता औंल्याउनुभयो ।
त्यस्तै समारोहमा शिक्षा विज्ञान तथा प्रविधि राज्यमन्त्री प्रमिला कुमारीले पुस्तकालयहरुमा रुपान्तरणको आवश्यकता रहेको र प्रविधिसँग पुस्तकालयलाई जोड्नुको विकल्प नरहेको बताउनुभयो । सोही अवसरमा पूर्व मन्त्री गणेश शाहले सुरुका दिनहरुमा जनताको स्तरबाट मात्रै यो दिवस मनाइएकोमा हाल राज्यले समेत यसको अपनत्व ग्रहण गरेकोमा खुशी व्यक्त गर्नुभयो ।
समारोहमा शिक्षा विज्ञान तथा प्रविधि मन्त्रालयका सचिव तथा मूल आयोजक समितिका अध्यक्ष सुरेश अधिकारीले समतामूलक समाज निर्माणमा पुस्तकालयको भूमिका उपर चर्चा गर्दै समारोहलाई सफल बनाउन आबद्ध सबैलाई धन्यवाद दिनुभयो ।
समारोहको अवसर पारेर देशभरीबाट पुस्तकालयको क्षेत्रमा महत्त्वपूर्ण योगदान पुर्याउने व्यक्तिहरुलाई सम्मान गरिएको थियो । उत्कृष्ट पुस्तकालय अभियान्ताको रुपमा रिड नेपालका अध्यक्ष भोला श्रेष्ठ, उत्कृष्ट पुस्तकालयको रुपमा काठमाडौं रक्तकाली स्थित आशा सफू कुथि, उत्कृष्ट पुस्तकालयकर्मीको रुपमा मातृभूमि सामुदायिक पुस्तकालय बिर्घा स्याङ्जामा कार्यरत जोगप्रसाद पाण्डे र उत्कृष्ट पाठकको रुपमा रुक्मिणी चालिसे गोदावरी न.पा.४ बडीखेललाई अभिनन्दन गरिएको छ ।
तत्कालिन राजा गीर्वाणयुद्ध विक्रम शाहले `पुस्तक चिताइ तहविल´ नाममा पुस्तकालय स्थापन गर्न लालमोहर जारी गरेको दिन (१८६८ भाद्र १५ शुक्रबार)लाई स्मरण गर्दै प्रत्येक वर्ष भाद्र १५ गते राष्ट्रिय पुस्तकालय दिवस मनाउँदै आइएको छ ।
