इलाम,१६ भदाै । नेपाली कांग्रेसका उपसभापति धनराज गुरुङले असल शासनको कुरा मात्रै गरेर नहुने भन्दै अहिलेसम्म सत्तामा बसेका सबैको सम्पत्ति छानबिन गर्न आवश्यक रहेकाे बताउनुभएकाे छ ।
इलामको माई नगरपालिकामा नेपाली कांग्रेस प्रदेश सभा क्षेत्रीय कार्यसमिति १(१)को प्रदेश सम्मेलनलाई सम्बोधन गर्दै उपसभापति गुरुङले सो कुरा बताउनुभएकाे हाे ।
सत्ताबाट बाहिरिएपछि प्रतिपक्षीले ‘गाली’को राजनीति सुरु गरेको बताउनुभएकाे छ । उहाँले संविधान संशोधन गरेर सांसदको सख्या घटाउनु पर्ने बताउनुभयाे । उहाँले प्रत्यक्ष निर्वाचन प्रणालीमै समानुपातिकको व्यवस्था राख्नु पर्ने धारणा राख्नुभयाे । उहाँले अर्थतन्त्र सुधारका लागि गाँजा खेतीलाई कानुनी मान्यता दिनुपर्ने बताउनुभयाे । उहाँले स्थानीय मदिरालाई ब्राण्डिङ गरेर करको दायरामा ल्याउनु पर्नेमा समेत जोड दिनुभयाे ।
सम्मेलनमा नेपाली कांग्रेस इलामका जिल्ला सभापति डम्बर खड्का, पूर्वसभापति केशव थापा, क्षेत्रीय सभापति शमशेर राई, नेता भेषराज आचार्य, जिल्ला उपसभापति खगेन्द्र देवान लगायतले मन्तव्य राख्नुभएकाे थियाे।
